Nollywood Legend Hanks Anuku Battling Depression & Alcohol Addiction

Nollywood Legend Hanks Anuku Battling Depression & Alcohol Addiction

Nollywood actor, Hanks Anuku, don yarn say im dey drink sake of depression wey im dey battle with.

People don see Hanks waka about di streets dey look unkempt and e don bring plenty attention for am. E even ask for financial help, but Nigerians dey wonder wetin im go use di money do since e no clear. Plenti fans wey dey worry about im health don dey talk say make e go rehab.

But Hanks don talk say e no need rehab at all, say wetin e need na money. For one Instagram story wey e post recently, e talk say na im son record di viral video wey dey go around, and e dey thank im fans well-well for di support wey dem dey give am.

For another video wey e drop on Tuesday, di actor use di chance to tell im fans thank you again. E talk say im wahala na depression, no be say im dey do drugs.

E talk say, “I know say una don hear plenty tory about me, but God dey my side. E go send im angels and messengers come my side, and when dem come, all of una go dey part of di blessing.”

Di actor come talk more, “Yes, na depression dey make me drink but I no dey take hard drugs at all.

“Because of depression, I no get work for many years, I dey think about my pikins, their school fees, and dia welfare and other things. And you know how e dey be when e reach dat kain level.

“I call am breaking point, I break into pieces and I gats go drink, na im be dat.”